Am Kader vum « Weekend vun den oppene Kierchen » huet den Naturpark Our e Samschdeg, de 4. Juni säin neie Vëlos-Tour presentéiert, bei deem Kultur a Landschaft verbonne ginn. Ënnert dem Numm « Looss d’Kierch am Duerf » verleeft de Rondwee duerch d’Gemengen Ëlwen a Wäiswampech laanscht 10 Duerfkierchen.
Ma, wat eigentlech als E-Bike-Tour virgestallt gouf, ass sécherlech och fir den traditionelle Vëlo a Mountainbike, fir ganz motivéierter souguer zu Fouss machbar. De Start vun dësem Wee vun 28,5 km ass bei der Gare zu Ëlwen.
![Looss d'Kierch am Duerf!](https://www.moien.lu/wp-content/uploads/2022/06/04062022CaroLineM0001_DSC5428-1024x683.jpg)
Scho säit laangem faszinéieren eis Kierchen duerch hir Architektur, hiren ale Charakter an déi reliéis Symbolwelt. Zil ass et mam Vëlos-Tour d’Natur mat der Kultur ze verbannen. Aus dësem Grond sinn d’Kierchen all Dag accessibel.
Erméiglecht gëtt de ganze Projet duerch d’Zesummenaarbecht vum Naturpark Our a sengen Aarbechtsgruppen, Vertrieder aus de Membergemengen Ëlwen a Wäiswampech, Membere vun de lokalen a regionalen Tourismusverbänn a Vertrieder vun « Oppe Kierche Lëtzebuerg », sou wéi och zuelräiche Benevollen, déi beispillsweis all Dag d’Kierchen op- an zouspären.